Ua amata i le Aso Gafua o le vaiaso nei le piliota o faatosina o le palota mo sui tauva, ma ua savalia ai e le vaega faaupufai o le Faatuatua i le Atua Samoa ua Tasi nuu ma itumalo o le tatou motu o Savaii e faaauau ai le faalauiloa o lana tapenaga o galuega ma atina’e pe a toe tula’i i le pulega o le malo, ina ua mae’a ona tatala aloa’ia le latou faalauiloa i le Aso Toonai na te’a nei i le maota o Apita o Pisaga i Salelologa, lea sa faailoa lautele ai e le ta’ita’i o le patī faaupufai le latou tapenaga.
O le poloketi o le miliona sa faatino i le paea’iga ua faatā’ape nei a le Palemene, ua faailoa e le ta’ita’i le susuga Laaulialemalietoa Polataivao Leuatea Polataivao Fosi Schmidt o le a siitia mai le miliona tala i le tausaga i le 1 tesimale 5 miliona faapea le 2 miliona tālā i le tausaga.
E fuafua lea siitaga i le tele o nuu o itumalo aemaise o le a iloilo ai foi le tulaga sa faatino ai e Fono Faavae a latou atina’e i le fā tausaga talu ona faatino lea taumafaiga i Samoa mo le taimi muamua.
O se tasi o tapenaga a le Faatuatua i le Atua Samoa ua Tasi o fesoasoani tau tupe o le a maua e tinā mai le taimi o o latou ma’itaga o le a maua fua togafitiga ma talafua vai.
O le a maua ai foi ma le fesoasoani tupe e 200 tala, e ese ai ma le ta’i selau tala e maua i le masina mo tausaga e tolu mo le tausiga o le pepe.
O lea fesoasoani e tusa ma le $3,800 tala i le 3 tausaga, poo le tasi le afe luaselau tala i le tausaga.
O nisi o fuafuaga ua tapena iai lea patī faaupufai, o le vaai fua o le foma’i ma talafua vai mo tagata uma ua aulia le 60 tausaga o le soifua, siitia le penisione i le 300 tala i le masina pe a aulia le 65 tausaga o le soifua, ma le siitaga e 500 tālā i le masina o le penisione pe a oo le matua o le soifua i le 70 tausaga.
O tagata e iai aafiaga tumau o le a siitia le latou faamanuiaga tau tupe i le masina i le 300 tala, vaai le foma’i ma talavai e aunoa ma se totogi.
O se tasi o tapenaga tele ua faailoa e le ta’ita’i o lea patī o se vaegatupe e tusa ma le 300 miliona tālā o le a toe tapena ai le aumaia o ni vaalele tetele se lua mo malaga mai Samoa aga’i atu i Niu Sila, Ausetalia, ma Amerika.
O le atoaga o le tapenaga a le Faatuatua i le Atua Samoa ua Tasi o loo maua i lana auala o faasalalauga i luga o le api o foliga le facebook, e faapei foi o isi vaega faaupufai ua mae’a faalauiloa a latou tapenaga mo le palota tele.
