E $230 miliona tālā Niu Sila, le tau aofa’i o le galuega fou ua faamaonia mai o le a amata faatino nei.
O le fausia lea o se falea’oga mo a’oa’oga faafoma’i i le nofoaga a le Iunivesite o Waikato.
E tusa ai ma lenei fuafuaga, o le a mafai ona maua ai le avanoa a fanau a’oga ua faauu ma ua maua tikeri faafoma’i e faaauau ai nisi o polokalame faalea’oa’oga tāua i lea matātā e aga’i tonu i vaega ua ta’ua o rural and primary care doctors.
Faamauina o le malo o le a faatupeina le $82.85 miliona o lea galuega, ae silia ma le $150 miliona o le a faatupeina e le Iunivesite o Waikato, ua faamanino o nisi o fesoasoani e tuuina atu mo le Iunivesite.
Ua ta’ua le oo atu i le 120 fanau a’oga o le a mafai ona auai i polokalame i lea falea’oga i tausaga ta’itasi e amata atu i le tausaga e 2028.
E aofia ai le 100 o avanoa o le a faaopoopo atu i Iunivesite o Aukilani ma Otago.
Sa tele ina fefālōa’i le matāupu i felafolafoa’iga i totonu o le maota fono ona o le taugatā tele o lea fuafuaga, ae o lea ua faamaonia ma talia e le Kapeneta.
O loo faamanino ai foi, o le naunauta’iga lava o le faia ai o lea falea’oga fou, ina ia mafai ona tali atu i le ‘uti’uti o le numera ua iai nei foma’i i le tele o nuu i tua.
Puna o Faamatalaga: https://www.nzherald.co.nz/nz/politics/watch-live-luxon-speaks-to-media-as-inflation-worsens/MTHFDP4SVJFLLLJERH4PFXC5XY/?lid=h6us1x2uiihv
