O le masina o Novema o le tausaga nei, o le a mafai ai ona femalagaa’i i latou o loo umia tusifolau Saina o loo iai foi se visa e malaga ane ai i Ausetalia, e malaga mai i totonu o Niu Sila e aunoa ma se visa.
E oo atu lava i le 3 masina e mafai ona asiasi mai ai i totonu o le atunuu e aunoa ma se tulaga e moomia ai le talosaga i se visa e ulufale mai ai i le atunuu.
Ua faamanino e le Minisita o Femalaga’iga ia Erica Stanford, e 12 masina lea e faaagaga e mata’itūina ma faata’ita’i ai lea feutaga’iga poo le ā sona taunuuga.
Ma o lona faanaunauga ia saga faatupula’ia le numera o tagata e tafafao mai i le atunuu.
Ma i lipoti, o le tasi o mafua’aga ua amata faagasolo ai ia fuafuaga, ina ua maua faamaumauga e silia ma le 240,000 tagatānuu Saina na faimalaga ma asia Niu Sila i le tausaga na te’a nei.
O nisi o suiga i le faimalaga mai ai o tagatānuu Saina e aofia ai le aveese o aiaiga o le tatau ai ona aloa’ia e se loia le faaliliuina o pepa malaga mo visa “removing certified translation requirements for visa documents”, ae tuuina atu le fesoasoani i Saina mo le faigamalaga poo travel agents.
Ua faamauina e oo i le $1.4 piliona na sasaa mai i le tamaoiga o Niu Sila e mai le aofa’iga o tagatānuu Saina na asiasi mai i Niu Sila mai le amataga o le tausaga seia paia le masina o Mati.
Puna o Faamatalaga: https://www.1news.co.nz/2025/06/15/nz-to-launch-visa-waiver-trial-for-chinese-visitors-from-australia/
