E ui i le sau ai o fuafuaga fou a le malo mo ē o overstayers, ae o le asō lea na faalauiloa mai ai e le malo e ala i le tama’ita’i minisita ia Erica Stanford le faaopoopo ai o nisi o vaega e fesoasoani i tagata galulue i tomai faapitoa e aumau ai i Aotearoa nei.
O lenei fuafuaga ua ta’ua o le a fesoasoani tele lea i le mana’oga o loo iai mo tagata faigaluega ma pisinisi i totonu o le atunuu, aemaise mo i latou o kamuta, o inisinia ma isi.
Faamauina i lea faalauiloa o le a amata lenei vaega fou i le ogatotonu o le tausaga fou 2026, ma o le a tatala lea mo i latou o tagatānuu mai fafo o loo galulue i galuega e faaaogā ai tomai faapitoa (skilled worker).
Ta’ua foi o le a taga’i lelei i vaega ma itu o loo moomia tele ai tagata nei ina ia mautinoa e faaauau ai ona atia’e ia galuega.