Ua faailoa mai nei e le Malo ni tulafono (rules) e faasala ai tagata e umi ona nonoa a latou ta’ifau se’i tulou, ua lamatia ai le ola saogalemu o le meaola.
O le masina fou o Setema i le aso 25 ua fuafua e faamamalu ai nei tulafono fou, lona uiga e lē tatau i se tasi ona nonoa lana ta’ifau i se maea, uaea, poo se filifili i se vaega patino o lona fanua mo se taimi umi ua afaina ai le meaola.
O nei suiga o le a mafai ai e i latou o loo asiasia le soifua manuia o ta’ifau ona faia ni moliaga o se tasi pe afai ua latou maitauina le afaina o se ta’ifau ona ua umi tele se taimi o nonoa ai i se vaipanoa.
O nei foi suiga o le a lē mafai ai ona nonoa tama’i maile ma maile fafine o loo petitō, se’i vaganā taimi o iai ni tagata o loo asiasi atu i le fale poo nisi ta’ifau o loo iai i le fanua, mo se taimi lē tumau.
I se faamatalaga mai le Minisita Lagolago o Faato’aga, Andrew Hoggard na ia ta’ua ai, o le umi o se taimi o nonoa pea ma saisaitia se ta’ifau, e faapogaia ai lagona mafatia o le meaola ma afaina ai lona ola mālōlōina ona ua umi e lē o mafai ona sa’oloto e fealua’i solo.
O inā e mafua ai ona ōu faataitaiō i taimi uma, ma iai uiga malolosi ma isi uiga fe’ai o le meaola, ma ono lamatia ai foi tagata o le aiga, o tagata lautele ma isi foi meaola.
O sala tupe o le a iai:
- $300 tālā pe afai e manatu le tagata asiasi mo meaola, o le solitulafono e ono faapogaia ai sina afaina o le meaola mo se taimi lē tumau.
- $500 tālā pe afai e manatu le tagata asiasi mo meaola, o le solitulafono e ono faapogaia ai sina afaina se’ia oo ina ua atili afaina le meaola mo se taimi lē tumau.
E mafai foi ona faia nisi moliaga e i’u ai lava i le faamasinoga pe a oo lava i ooooga o lenei matāupu.
Puna o Faamatalaga: https://www.rnz.co.nz/news/national/571136/government-introduces-rules-to-punish-people-for-prolonged-tethering-of-dogs
