O le leai o se faigā filifiliga a le itumalo palota o Faleata 2, ua faaitiitia ai nei le aofa’iga o le lola autū o loo faamauina ai suafa o tagata palota ua agavaa mo le faigā filifiliga aoao a le atunuu i le Aso Faraile o le vaiaso nei i Samoa.
I le aofa’iga e 101,981 sa faamauina i le lola autū o tagata palota i le lua vaiaso ua tuana’i, ua suia nei i le na o le 97,108 tagata palota o le a faia le filifiliga mo nofoa e 50 o le Palemene.
Ae o le leai o se palota a Faleata 2 sa fesiligia ai le Komesina i se silasila mamao a lona ofisa i aiaiga o le tulafono o faigāpalota, lea ua lē mafai ai ona faatino le aiā tatau a tagata palota e 4,873 o Faleata 2 ina ua faamaonia e le faamasinoga e lē agavaa sui tauva e to’alua sa faasaga iai le lu’i a le sui tauva ua filifilia aloa’ia nei o le sui usufono o lea itumalo le tofa Leatinuu Wayne Sooialo.
Le Komesina o faigāpalota i le feiloa’iga ma tusitala i le Aso Lulu o lenei vaiaso, afioga Toleafoa Tuiafelolo Alexander John Stanley.
