Ua faaitiitia i ni faaiuga a le faamasinoga o talosaga apili a le faamasinoga maualuga ni faasalaga faafalepuipui na togisala ai le faamasinoga maualuga i se tina na ioe i moliaga o le umia o se laau malosi ma le faaoo manu’a, faapea se tamā na faamaonia lona moliaga o le faiaiga faamalosi ma sona alo teine e 14 tausaga le matua.

O le tina o Leuluaialii Selesitine Rosemarie Vaaulu na ioe i moliaga e fā e aofia ai le umia o se laau malosi e lei laiseneina, faaoo manu’a tuga, le umia o se aupega matautia o se laau malosi, ma le moliaga o le faapa o le laau malosi lea na lavea ai se taulealea.

Na faamaonia ona moliaga ma faasala ai e le faamasinoga maualuga i le sefulu masina.

Peitai na talosaga lē na molia ma lana molia i le faamasinoga o talosaga apili, ma finauina le maualuga tele o le faasalaga pe a fua i le gaioiga a lē na molia, sa mafua ona ia faia o le puipuiga o ia ma lona toalua mai ni taulelea o le nuu na faaoolima i le toalua o lē na molia.

I le silasila a le faamasinoga o talosaga ua talafeagai le finauga a le itu talosaga ma ua faaitiitia ai le faasalaga i le 3 masina.

Talu mai Aokuso o le tausaga nei na faia ai le faasalaga ua atoa le tolu masina, ma ua magalo Leuluaialii ua mae’a lona faasalaga na tuli.

I le tamā na molia ma faamaonia lona moliaga o le faiaiga fai faamalosi i lona afafine moni na faasala i le masina o Fepuari o le tausaga nei i le 18 tausaga i le falepuipui.

O le silasila a le faamasinoga i le talosaga e toe iloilo le faasalaga ua faapena ona talia, ma ua faaitiitia ai i le 13 tausaga e nofosala ai lē ua molia i le falepuipui.

E lua isi mataupu sa tagofia e le faamasinoga o talosaga apili e lei aumaia ni faaiuga ma e aofia ai ma le talosaga apili a le Fofoga Fetalai faasaga i le faaiuga a le faamasinoga maualuga ua faamuta ai le togisala a le Palemene lea na faamalolo lē tumau sui faipule o Lepa ma Faleata 3 mo le 2 tausaga poo le 24 masina.

E lē o iloa se aso e fofogaina ai le faaiuga.