O ta’ita’i o vaega faaupufai e tolu e aofia ai le Faatuatua i le Atua Samoa ua Tasi, Samoa Ua Potopoto, ma le pati e puipuia aiā tatau a tagata, ua molimauina e iai sui faatutū o le a latou lu’iina nofoa o itumalo o ia ta’ita’i, le susuga Laauli Leuatea Polataivao Fosi Schmidt, afioga Fiame Naomi Mataafa, ma le susuga Tuilaepa Lupesoliai Sailele Malielegaoi.

O le palota tele o le tausaga e 2021 e le’i palotaina tofi o le itumalo o Lepa ma Lotofaga, ae i le faiga filifiliga ia Aokuso e toe sa’ili ai ni sui usufono o le Palemene o lea ua faailoa lautele sui tauva e to’alua o le pati faaupufai o le Faatuatua i le Atua Samoa ua Tasi e aofia ai se tamaitai, o le a lu’iina le nofoa o Lotofaga lea sa tula’i ai le afioga i le Sa’ofaapito.

O i la’ua ia o le tamaitai le afioga Fuimapoao Taliilagi Beth Onesemo, ma Fiaola Iosua Lole.

O le itumalo o Lepa sa tula’i ai i le tofi le susuga Tuilaepa Lupesoliai Sailele Malielegaoi, e to’atasi le sui faatū o le Faatuatua i le Atua Samoa ua Tasi o le a lu’iina le nofoa o le itumalo, le afioga Tupua Ioane Tupua.

Ae i le itumalo o Gagaifomauga 3 lea sa tula’i ai i le tofi faipule le ta’ita’i o le Faatuatua i le Atua Samoa ua Tasi, le susuga Laauli Leuatea Polataivao Fosi Schmidt, o le a tauva ai le sui tamaitai le afioga Faaulusau Rosa Lavea.

O le aso 7 i le aso 12 o Iulai e faaulu ma lesitala ai suafa o sui faatutū o le faigapalota, ma o le a iloa ai i le mae’a o lea tapenaga poo ai sui faatutū o le a faamautū le avea ma sui tauva i le faamalieina o aiaiga o le agavaa e faasino i le monotaga, ma le atoa o le 3 tausaga o nofo i Samoa.

O isi agavaa o le tatau ona lelei le soifua mālōlōina ma e le’i faamaonia foi se moliaga tau solitulafono i le faamasinoga.