E to’atolu ni tagata na faamaonia le maliliu i luga o le auala i Waiuku, ma ua faailoa mai suafa o i latou nei.
Ta’ua o i latou ua maliliu, o se tinā e suafa ia Frances (Sesi) Latu-Vailea, o si ana tama teine e igoa ia Oneahi Vailea ma sI ona tei poo sona niece e igoa ia Marly Tulua.
Ua faamauina na maliliu lea tinā ma le fanau laiti e to’alua, ina ua lavea le taavale na aga’i atu ai i latou i le Masters Rd, e lata ane i Waiuku i le aoauli o le Aso Lua.
Na maliliu uma lava i latou i lea nofoaga.
I molimau mai lē na mua’i iloa atu le taavale na ia ta’ua, na ia maua atu le taavale o ū i lalo le taavale, toeitiiti lava a lilo i se tasi o vai na lavea ai.
Ua māua i lipoti mai le NZ Herald, na molimauina le tuuina ai e tagatānuu ni teu fugalaau i le faaitu na tupu ai le faalavelave.
Ae na molimauina foi le to’atele o tagata na faatino a latou saafiafiga mo le tinā ia Frances (Sesi) Latu-Vailea.
Ma e ta’ua e le to’atele o Sesi o se tinā alofa ma o se tasi na alofagia e le to’atele.
E tusa ai ma faamaumauga i luga o upega tafailagi, o Sesi sa galue i auaunaga tau faamasinoga i Saute o Aukilani.
Ta’ua foi e se tasi o sui o le aiga le loto faavauvau o le tane a le tama’ita’i ia Sesi, ma o loo ia faailoa le faigatā tele o le faalavelave ua tula’i mai i si o latou aiga.
