Ua faailoa i le CNN se finagalo o le Palemia o Niu Sila Christopher Luxon e faatatau i le Palemia o Isaraelu Benjamin Netanyahu.
Fai mai Luxon o le fuafuaga a Isaraelu e nofoia Gaza City e matua’i le taliaina. O loo ta’ua i le lipoti o loo silasila le malo o Niu Sila pe auai faatasi ma isi sui o le Five Eyes e aofia ai Ausetalia, Peretania ma Kanata i le amanaiaina o le setete o Palesitina pe leai ae o loo faatupulaia pea le lē fiafia o tagata ma atunuu i le fuafuaga a Isaraelu ile faateteleina o le taua i Gaza ma puleaina loa Gaza city.
Ta’ua e Luxon e lē o faalogo Netanyahu i valaau ma manaoga o le sui faavaomalo ina ia faaoo atu le fesoasoani mo tagata i Gaza.
E le o iai se tali faamauina mai le ofisa o Netanyahu i faamatalaga ia a le Palemia o Niu Sila sei vagana nisi o faamatalaga mai le SuiM o le Va i Fafo a Isaraelu i luga o le upega tafailagi a le X.
O loo faaauau pea ona vaaia ata o osofaiga a Isaraelu i Gaza aemaise o nai tagata fia aai ma i faamaumauga aupito lata mai ua iloa ai a itiiti mai e 227 tagata e aofia ai ma tamaiti e 103 ua maliliu ona o le leai oni meaai talu ona amata mai le vevesi i lea itu o le lalolagi.
Ta’ua e le CNN o Luxon le taitai muamua mai le itulagi i sisifo o le lalolagi ua faailoa faalauaitele ana faitioga i le taitai o Isaraelu.
Puna o Faamatalaga: https://edition.cnn.com/2025/08/13/asia/new-zealand-luxon-israel-lost-the-plot-intl-hnk
