Ua faailoa se finagalo o lē sa avea ma Palemia o Niu Sila i tausaga ua tuanai, Helen Clark e faatatau i le tamaitai Palemia na faatoa faamavae atu nei, Jacinda Ardern. 

Na saunoa Clark e pei ona lipotia i le RNZ o le a manatua pea Ardern i lona taimi ma ana faiga faavae sa faasaoina mai ai le faitau afe o tagata Niu Sila i le taimi o le pandemic. 

E le gata i lea o se faataitaiga lelei foi i le ituaiga puleaina o se atunuu i le vaitau o le social media ma le mau faafitauli e aliae.

Ta’ua e Clark e moni e fiafia mo Jacinda o le a agai e faasolo ana fuafuaga i lona foi aiga ma le lumanai peitai e tumau pea le lagona faanoanoa i lona agai ese ona o taitai e pei o Ardern e le faigofie ona maua.

Ina ua faia’ina i le palota o le 2008, na agai ai loa Clark i le tofiga lea i Malo Aufaatasi, fai mai a ia o le isi foi lea avanoa mo Ardern ma o loo telē lava le taimi e faatino ai nisi o ana ia lava fuafuaga e ave iai le faamuamua.

O le asō lea ua fuafua e faia ai le lauga faaiu a Ardern i le Palemene ma agai ese aloaia ai ma le faapolokiki i le vaiaso fou.

O le vaiaso nei ua faailoa ai le tofia o Ardern e avea ma sui faapitoa o le Christchurch Call o se fuafuaga sa ia amatalia a o avea ma Palemia ma ua faailoa i le lipoti o lea avanoa o le a lipoti sa’o i le Palemia ma e le o manao Ardern e totogi ai ia i lea galuega.