I le una’i a le malo mo afioaga ma itumalo ta’itasi e galulue i le faatinoga o a latou atina’e tau faato’aga ma faigafaiva, e tolu afioaga na faatino a latou faaaliga o le Talomua i le faai’uga o le vaiaso.
O le afioaga o Satapuala, o le Komiti o Tina Aleisa Sisifo ma le afioaga o Magiagi, o nuu ia e tolu lea ua mae’a faatino a latou faaaliga o fua o faaeleeleaga ma figota o le sami.
O nisi ia o afioaga ua faaaopoopo atu i le tele o nuu ma itumalo ua faailoa a latou atina’e eseese e pei o faato’aga eseese, o fualaau faisua ma fualaau’aina. Na faafetaia e le Minisita o Faato’aga ma Faigafaiva, Laauli Leuatea Polataivao Fosi Schmidt afioaga nei ma faalapotopotoga i le latou galuega fita ma le galulue punoua’i ua tino mai ai lea atina’e tetele.
Na ia fautuaina foi fai faato’aga ma sui o nuu ina ia lagolago i le gaioiga a le Matagaluega o loo faagasolo nei i le taumafai lea e faatama’ia le manu’ainiu poo le rhinoceros beetle lea o loo tele ina afaina ai mea totō ma faato’aga eseese.
