Ua toe o ni vaiaso mae’a le masina o Aokuso ona sosoo lea ma Setema o le a faagasolo ai polokalame o le Teuila e pei ona faailoa e le pulega o tagata tafafao mai fafo le polokalame ua pasia e le Kapeneta.

O le Aso Sa le aso 3 o Setema o le a tatala aloaia ai le polokalame o le Teuila ma faagasolo ai le faaaliga o pese lotu ma pesepesega faaleagaga ma e faia i le maota o tupulaga a le EFKS i Sogi.

O le Aso Gafua 4 o Setema e oo i le Aso Faraile 8 o Setema e faagasolo ai i le afiafi tauvaga masani o faafiafiaga ma pese faasamoa.

O le Aso Lulu o le vaiaso lava lea i le afiafi o le a faia ai le uluai vaega o le tauvaga o le sailia o se Tausala o Samoa ma e faia i luma maota o le Malo i le eleele fou.

Ua faatulaga foi o le a faia Tuuga Fautasi i le Teuila o lenei tausaga ae o le vaega mulimuli o le po o le Aso Toonai ma o le taualuga foi lea o le Teuila o le a faagasolo ai le polokalame aloaia o le sailia o se Tausala o le atunuu.

E toasefulu tamaitai ua faalauiloa o latou suafa ua sii o latou aao e fia auai i le tauvaga, ma ua aofia ai le tausala o Samoa mai Niu Sila ma le tausala o Samoa mai Ausetalia i le setete o Niu Sa Uelese.

O le tausaga muamua lenei ua suia ai le kamupani e tapenaina le tauvaga o le Tausala o Samoa lea ua tulai mai ai le Onomea Productions ae lagolago autu le kamupani telefoni feaveai o le Digicel.

O tamaitai e toasefulu o le a sailia ai se Tausala o le atunuu.

O Cherish Faamanū Manaia o le tausala o Samoa mai Niu Sila, Moemoana Safaato’a Schwenke o le tausala o Samoa mai le setete o Niu Sa Uelese i Ausetalia, ma tamaitai e toavalu mai Samoa o Helen Vera Isitolo Lemisio, Karameli Serah Purcell, Miracle Afelē o se tamaitai e iai ona manaoga tumau, Moeloto Vitolia Willimina Tuilaepa Tiatia, Nicolina June Ah Kuoi, Siliva Siaea, Tashana Lee Opelu, ma Vaelei Von Dinklage.