O se tagatānuu Ausetalia lea na tuua’ia i le sola ese mai le vaipanoa na tupu ai se faalavelave mata’utia tau taavale, e latalata i le Malae Vaalele i Aukilani ma maliu ai se tasi, ae o lea ua faailoa le igoa o lea alii.
O le alii mai Melepone Ausetalia, o Michael Rockafella, e 36 tausaga o lona matua, o nei lea na tula’i ai i le Faamasinoga Maualuga i Aukilani mo le ulua’i taimi i luma o Justice Mathew Down e tali i ona moliaga o le fasioti tagata pa’ivalea e māfua mai lena faalavelave.
I le tauala atu i lana loia, o loo tetee ai le alii o Rockafella i lona moliaga o le fasioti tagata pa’ivalea, le faapogaia o manu’aga i se isi tagata a o ia aveina i se tulaga mata’utia se taavale, le mauaina ia te ia o le fualaau faasāna o le ‘aisa, le aveina o se taavale a o matuā ova le ‘avamalosi ma isi vailaau faasāina na maua i lona toto, ma maua foi iai le laau mariuana.
O lea la ua faatulaga le faamasinoga e valaau ia Oketopa o le tausaga fou.
O le Aso Lulu, 30 o Iulai i le tausaga lenei, i le tusa o le 4 i le vaveao na lavea ai le taavale a le alii lea o Rockafella i George Bolt Memorial Drive, o le auala tele e aga’i atu i le malae vaalele, ma o lea faalavelave na maliu ai le tamā ia Arvind Ronald Kummar e 45 tausaga le matua, ae taofia i le falema’i i ni manu’aga ogaoga si ana avā.
O si tamā lea ua maliu, o Arvind Kummar, e faapea se lipoti, o le taeaopo lena sa aga’i atu ai le la taavale i le malae vaalele mo le fuafuaga e faaee si ona to’alua sa fuafua e fia malaga i Fiti e auai i le maliu o sona auntie, ae peita’i na le’i taunuu na fuafuaga ina ua lavevea le taavale a si ulugalii ma le taavale a le alii ua molia nei.
O se tala lata mai a se uō vavalalata i sia aiga na aafia, sa faailoa atu i le Herald, o lea ua faasolosolo manuia si fafine o Jashoda Goundar mai manu’aga tugā o lona maea ario o loo taoto ai i le falema’i i Middlemore.
