O lea ua faasilasila nei e le Komesina o faigāpalota le afioga Toleafoa Tuiafelolo Alexander John Stanley i se faasilasilaga faalaua’itele le aloa’ia o le filifiliga o le sui usufono mo le nofoa o le itumalo faapalota o Faleata 2 o le tofa Leatinuu Wayne Sooialo.
Ua faailoa ai e le Komesina o faigāpalota i lana faasilasilaga ua faia lea faai’uga e tusa ma le fuaiupu 59 (1) o le Tulafono o faigāpalota o le tausaga 2019 e mafua ona ua leai se faigāpalota a lea itumalo, ina ua mae’a le faamasinoga sa lu’i ai le agavaa o le monotaga ua lē mafai ona faaauau le tauva o sui e to’alua sa faasaga iai su’esu’ega a le faamasinoga.
E pei ona silafia o lea matāupu tau faamasinoga ua faamaonia ai e lē ausia e le sui tauva le afioga Muaaufaalele Mary Faafouina Ta’eu ma le tofa Ulugia Piliopo Elon Betham aiaiga o le agavaa i le monotaga faalenuu.
O le aloa’ia o le filifilia o le tofa Leatinuu Wayne Sooialo ua totoe ai nei nofoa e 50 o le a faia iai le filifiliga a le atunuu aoao i lana palota tele i le Aso Faraile nei, ae o le Aso Lulu lenei i Samoa ua amata faagasolo ai le palota muamua le pre-polling.
O le valu i le taeao e tatala ai fale palota ua filifilia mo le palota muamua.
E 5,053 na talosaga e palota muamua ae na o le tasi le afe ma ona tupu ua talia talosaga mo le palota muamua.
O le ta o le 9 i le taeao o lenei Aso Lulu i lo tatou atunuu e tatala ai fale palota ua filifilia mo le palota muamua ae tapunia i le ta o le 4 i le afiafi.
