I le atoa ai i le tausaga lenei 2025 o le iupeli auro poo le 50 tausaga o le faigapaaga a le malo o Samoa ma le malo o Saina, o se tasi o fesoasoani tele a lea malo o le siitia o tomai o fanau i le itu i a’oa’oga.
Ua iai avanoa ua ofo mai e lea malo e a’ooga faasikolasipi ai alo ma fanau a le atunuu i Iunivesite eseese i Saina, ae o lea foi ua faaauau se isi fesoasoani o avanoa sikolasipi e totogi ai e lea malo a’oa’oga a nisi o fanau i le Iunivesite Aoao o Samoa.
E to’a 29 tama ma teinei ua faamautū lo latou maua o ia avanoa sikolasipi mo a’oa’oga i le semesa 2 o le tausaga ua mavae ma a’oa’oga i le semesa muamua o le tausaga nei.
Na faaalia e le amepasa o lea malo i lana saunoaga na faailoa ai ia avanoa sikolasipi, o sootaga o atunuu e lua na amata mai i le tausaga e 1800 ina ua ulufale i Samoa ulua’i tagatānuu o Saina sa aumai e galulue i faato’aga i le atunuu i taimi o pulega faakolone.
O le tausaga e 1975 na faato’ā faamauina aloa’ia ai le faigapaaga faavaomalo a Samoa ma lea atunuu se’ia oo mai i le taimi nei.
