O le faai’uga o le vaiaso na se’i mavae atu nei na tuuina atu ai a tatou tala fou e tusa ai ma le maliu ai o se tagata e to’atasi i se faalavelave tau taavale na alia’e mai i le Aso Tofi i Manurewa. 

Ae o lea ua faailoa mai e Leoleo a le Counties Manukau le suafa o si tamalii na fano lona soifua i lea faalavelave.

Ma e ta’ua o lē ua maliu e suafa ia Iu Toalua, 45 tausaga.

Ua faailo e le Ta’ita’i Leoleo, District Commander Superintendent Shanan Gray, le tuuina atu o le latou faamaisega i aiga o lē ua maliu. 

Mo le silafia o lenei matāupu na alia’e mai i le vaveao o le Aso Tofi ina ua vaaia e malu o le malo se taavale o le ituaiga o le Mitsubishi o loo aga’i mai Sharland Road ma se taavale i lona ituaiga o le Isuzu.

O le latou maitau, e foliga mai o loo tuliloa e le taavale Isuzu le taavale Mitsubishi.

Na ki atu ai a latou faailoilo i le taavale Isuzu ina ia tu le taavale o le Isuzu peita’i e le’i tu lea taavale.

Faamauina e le’i umi lava ona o latou tuliloa atu taavale nei ae so’a loa e le Isuzu le taavale Mitsubishi, ma vaaia ai loa le tifa i tua o le taavale o le Mitsubishi mai le auala ma feto’ai ai loa ma se laau. 

Na taumafai malu o le malo e fesoasoani atu iai ae pagā lea, na maliu lava Iu Toalua i lea nofoaga. 

E 56 tausaga o le isi alii ua molia nei e leoleo i le ave taavale mata’utia ua mafua ai se maliu, o le ave taavale faatamala ua mafua ai ni manua’aga, ma le tagofia o le foeuli e aunoa ma se faatagaga.

O loo taofia nei o ia i lalo i vaavaaiga a leoleo e tālia ai lona tula’i i luma o le Faamasinoga Faaitumalo i Manukau i le aso 18 o Iulai.

Puna o Faamatalaga: https://www.1news.co.nz/2025/07/01/police-release-name-of-victim-in-fatal-manurewa-crash