Na soisoi ma faailoa i tusitala e le ta’ita’i o le vaega faaupufai e puipuia aiā tatau a tagata, e na o le to’atolu sui tauva tuto’atasi ua mafuta ma galulue faatasi, e manumālō mai i le palota tele a le atunuu.
O lea finagalo o le ta’ita’i le susuga Tuilaepa L Sailele Malielegaoi sa tali ai i se fesili i le feiloa’iga ma tusitala i le Aso Lua o lenei vaiaso, ma sa ia faailoa ai foi o se mafutaga ua lē talafeagai i lana silasila ona e iai le faipisinisi o loo i tua o lea taumafaiga.
E le’i faailoaina e Tuilaepa i tusitala poo ai lea faipisinisi.
Le susuga Tuilaepa L Sailele Malielegaoi o le ta’ita’i o le vaega faaupufai e puipuia aiā tatau a tagata.
E le’i manuia sa’iliga i se finagalo o le ta’ita’ifono o le mafutaga tuufaatasi a sui tauva tuto’atasi e 32 e ui o nisi lipoti ua ta’ua ai e 27 sui tauva tuto’atasi o loo i totonu o lea mafutaga.
O le vaiaso ua mavae sa faalauiloa ai lea mafutaga e lē o se vaega faaupufai ma o loo taula’i tapenaga a ia sui tauva tuto’atasi i le tauave pea o o latou tulaga faatuto’atasi i totonu o le Palemene pe afai e manuia mai i le faigāpalota a le atunuu.
Ua latou sauni foi ma tapena e lagolago i se patī faaupufai e fausia ai se faigāmalo fou, peita’i e lē avea i latou ma sui o lea vaega faaupufai ae faaauau pea ona tutū to’atasi.
O le latou mau e taotaomia finagalo o tagata palota o o latou itumalo i le avea ma sui o se vaega faaupufai, ae e sa’oloto e faaleo mana’oga o o latou itumalo pe a avea ma faipule tuto’atasi i totonu o le Palemene.
