Ua mae’a nisi o galuega a le Pulega o Uafu ma Taulaga poo le Samoa Ports Authority i le tautuaina o le atunuu feafioa’i i le va o motu o Upolu ma Savaii, e pei ona faaleleia ai nisi o auaunaga i le uafu i Mulifanua ma Salelologa.
I Mulifanua o se tasi o vaega tāua e mana’omia e le atunuu o faleui lea ua fou uma ma e iva potu mo alii faapea tamaitai.
Ua mautū foi le faitoto’a autū e ulufale ma ulufafo ai mai le uafu lava i Mulifanua ina ia siitia ai le tulaga i le malupuipuia o le uafu i le ao ma le po.
Ua faailoa foi e le pulega o lea auaunaga tuma’oti a le malo le maua o fesoota’iga televavave o le WiFi i uafu i Salelologa ma Mulifanua ma e faaaogā e le atunuu e aunoa ma se totogi.
O loo faaauau nisi o galuega i le faamautūina o le tulaga malupuipuia o le nofoaga e tutū ai taavale a tagata faimalaga e fia tuu taavale i le uafu i Mulifanua ae totogi e 10 tala i le po.
O loo faagasolo foi le fausia o le nofoaga e fafaga ai maa o taavale e ola i le eletise i luga o ia uafu, faapea ma le galuega o le toe tosoina o le pa e si’o atoa ai le lotoā.
