O auala o fesoota’iga e faailoa lautele ai finagalo o tagata, o fuafuaga a patī faaupufai ma sui faatutū, o se tasi o vaega autū ma tāua tele i tapenaga a o lumana’i se faigāpalota tele a se atunuu e pulea faatemokarasi ma mulimulita’i i ala faaletulafono.
O tautua foi ma auaunaga tau faasalalauga o loo pulea e le malo o nisi ia o auala o fesoota’iga e taua mo le logo puialii ai o tagata uma a o tapena se faigā filifiliga, e toe saili ai ni ta’ita’i o le malo ma le atunuu, ma ua faailoa ai e le Minisita o Fesoota’iga ma Faamatalaga Faatekonolosi i le leito o le 2AP ma le TV9, ua iai le finagalo o le malo tausi e faaaogā e patī faaupufai ma sui tauva ia auaunaga a le malo.
O loo aiaia i le ta’iala o loo faatonutonu ai galuega a le ‘autusitala ma le ‘aufaasalalau a Samoa le tatau ona maua o le avanoa tutusa o soo se vaega faaupufai ma sui faatutū o se palota e faaaogā ai auala o fesoota’iga o loo i le vaaiga a le malo.
Le tofa Mau’u Siaosi Puepuemai o le minisita o le malo tausi mo le Matāgaluega o Fesoota’iga ma Faamatalaga Faatekonolosi i sona finagalo i le leitio ma le TV o loo pulea e le malo.
O tausaga ua tuana’i i pulegamalo sa iai sa molimauina le noatia o avanoa o ia auala o faasalalauga mo patī faaupufai ma sui tauva, e ese mai ia i latou o se patī faaupufai o loo pulea le malo.
O nisi ia o noataga na mafua ai ona ave i le faamasinoga i ni tausaga ua mavae se tagi na faaaogā auala o faasalalauga a le malo i le leitio ma le TV.
O le faai’uga a le Faamasinoga Maualuga i lena finauga na faamaonia ai sa iai le tapu a le malo i lea vaitau sa noatia ai ona faaaogā auala o faasalalauga a le malo e le ta’ita’i ma le patī faaupufai o le SNDP.
O le faalauiloaina o le vaega faaupufai fou o le Samoa Ua Potopoto le Samoa Uniting Party sa faasalalau e le leitio ma le TV a le malo, faapea auala o fesoota’iga televavave o loo i le vaaiga ma le pulega a le Matagaluega a le Palemia ma le Kapeneta.
