E sefulu aso e tatau ona faaulu atu ai i le Faamasinoga Maualuga ni matāupu e ala i ni tagi o faatosina solitulafono e māfua mai i le taunuuga o le faigāpalota aoao a le atunuu, e pei ona faailoa ai e le afioga i le Faamasino Sili le afioga Satiu Simativa Perese le ta’iala mo le tapenaina o ni tagi.
O lea sefulu aso e amata faitau mai le aso e faasilasila aloa’ia ai e le Komesina o faigāpalota le faai’uga aloa’ia poo le official results.
E ao ai i se matāupu e faaulu atu ona avatu uma tapenaga e lē gata o le tagi ma mau e lagolago ai ae o faamatalaga a molimau tauto.
Ia avatu ai foi ma se tagi e tali ai i ni tuua’iga poo le counter petition faatasi ai ma vaega e pei ona ta’ua.
E tatau foi ona tuuina atu ia tagi ae ua faailoa muamua i lē ua molia ina ia silafia ai mo sana tapenaga e tali ai i ni tuua’iga.
O le tasi o vaega tāua ua faailoa e le Faamasino Sili o le toe ave i tua o se tagi, ina ia manino lelei le tuuina atu o ni māfua’aga o le a toe faaui ai i tua se matāupu.
Ia faailoa ai e lē o se feutana’iga ma se soalaupulega o ni faiga faaālatua ua māfua ai ona toe faasolomuli se tagi.
O le Aso Gafua a sau e faafoi ai e le Komesina o palota i le afioga i le Ao o le Malo le taunuuga aloa’ia o le faigāpalota mo le faamaonia, ma faasalalau ai loa mo le silafia e le atunuu.
