O le vaiaso nei o loo talimalo ai le Kovana Sili ma le Malo o Niu Sila i le malaga, o se asiasiga taualoa a le afioga i le Ao Mamalu o le Malo o Samoa le afioga Tuimalealiifano Vaaleto’a Sualauvi II, o loo malaga faatasi ai ma lana Masiofo le afioga Faamausili Leinafo Tuimalealiifano.
O le Aso Lua sa amata ai polokalame o le asiasiga taualoa i le sauniga o le powiri sa faia i le maota o le Malo o Niu Sila i Ueligitone.
O le sauniga na faafeiloai ai e le Kovana Sili o Niu Sila le faigamalaga mamalu ma faatino ai nisi o sauniga faalemalo e pei o le asiasia o le tulai faaaloalo ma le faapāpā o fanafanua e 21.
O le Aso Lulu sa ave ai le faaaloalo a le afioga i le Ao o le Malo i le tautua a fitafita o atunuu o le Pasefika e ala i lona tauaao o se pale i le vaega ua ta’ua o le Pacific Island Memorial o loo i le nofoaga faamanatu o le National War Memorial Park i Pukeahu.
