Ua faasolo nei galuega taulogologo, ae o le galuega iloilo a le Matāgaluega o le Soifua Mālōlōina e su’esu’eina le lata i le 300 tagata, e faamauina sa fesoota’i atu i le tagata ua faamaonia lona aafia i le faama’i o le misela i totonu o Aukilani.
I faamaumauga e oo mai le aso 16 o le masina o Me, e to’atasi lava le tagata ua faamaonia lona maua i le misela, ma e le’i māua nisi ua maua i le faama’i.
I talaaga o lenei matāupu, o lē ua aafia e le’i leva ona toe foi mai i totonu o Niu Sila, mai i sana malaga na alu i le Atu Asia.
Mai faamaumauga a le Soifua Mālōlōina talu ona amata a latou iloiloga, ua faamauina le oo atu i le 286 tagata ua faafesoota’i o nisi na masalomia sa fesoota’i atu, ma sa latalata atu i lē ua aafia.
O le 206 o lea fuainumera, na faamauina le lē ono moomia ona toe faanofo vaavaaia poo le quarantine.
Ae o le to’a 78 o loo ta’ua le faaauauina ai ona faanofo vaavaaia, ia mautinoa lelei o loo puipuia le lautele mai le ono pesia i le misela.
O le 19 o le numera o tagata o loo masalomia o loo tālia su’esu’ega, e faamautinoa ai le aafia poo le lē aafia foi.
O loo faamauina foi le galulue o le soifua mālōlōina e fesoasoni ia i latou o loo nofo vaavaaia e ala i le avatu o le oo atu i le 50 o meaai taumafa ia i latou.
Ua ta’ua foi i le pepa o faamatalaga mai le Soifua Mālōlōina a le atunuu, e oo atu i le 17 potopotoga i totonu o Aukilani ua o latou faamaonia o ni potopotoga na lotolotoi ai le faama’i ma e 4 nofoaga o loo maitauina le ono aafia.
Ua faamauina foi le fautuaina malosi o le mamalu o le atunuu o ē e iloga ona ma’ale’ale i faama’i ina ia faia loa o latou tuipuipui le MMR vaccination.
Ua fautuaina e le Faatonu o le vaega o Puipuiga i le Soifua Mālōlōina ia Susan Jack, i aiga ina ia amata faia loa tuipuipui, aemaise lava i nai fanauiti, ma nisi o tagata matutua sa nonofo ma ola a’e i Niu Sila i le tausaga 1969 aga’i i le tausaga 2004, poo ē ua 21 ma 56 tausaga le matutua.
O loo fautuaina foi ē o loo fuafua e malaga ese ma le atunuu, ina ia mautinoa le faia o latou tuipuipui ina ia mautinoa le malupuipuia o latou mai le ono aafia, ae o tagata foi o loo fesoota’i atu iai mai le aafia i le faama’i o le misela.
Puna o Faamatalaga: Health New Zealand – Media Release
