Talu ona mae’a faatauto sui usufono o le paea’iga fou a le Palemene ma faatauto ai ma le faigāmalo fou i le Palemia ma lana Kapeneta faapea Minisita Lagolago, o loo faaauau i le vaiaso nei talu mai le vaiaso ua mavae ona faafeiloa’i Minisita ma Minisita Lagolago filifilia mo matāgaluega ma faalapotopotoga tuma’oti a le Malo.
O le Minisita o le Matāgaluega o Alāmanuia ma Leipa ma le pulega o tagata tafafao le tofa Fata Ryan Schuster sa faafeiloa’i i le Aso Gafua, faapea foi le Minisita o Faamasinoga ma le Faafoeina o Matāupu Tau Faamasinoga, o le Minisita o le Soifua Mālōlōina, ma le Minisita o le Matāgaluega o Eleele ma Fuagafanua.
Ua mae’a feiloa’i nisi o Minisita faatasi ai ma Minisita Lagolago ma matāgaluega ma faalapotopotoga ua galulue ai.
Sa molimauina foi i le vaiaso ua mavae na faato’ā faatofa ai nisi o matāgaluega e pei o le soifua mālōlōina ma le Minisita sa latou galulue i le paeaiga 17 a le Palemene.
Ae i le ulufale atu o Minisita ma Minisita Lagolago o le faigāmalo fou a le vaega faaupufai o le Faatuatua i le Atua Samoa ua Tasi ua lipotia e le nusipepa o le Samoa Observer le faailoa ai o le faamavae o le ta’ita’ifono o le Komiti Faatonu o le pulega o tagata tafafao le afioga Tauiliili Alise Stunnenberg lea e aloa’ia i le aso muamua o le masina fou o Oketopa, le Aso Lulu o le vaiaso a sau.
Ua faailoa e le faletua ia Tauiliili i lea lipoti, ua ia lagona ua lava ma totoe lana tautua i le atina’e o tagata tafafao sa auauna ai mo le 50 tausaga.
Ua ia faailoa foi o ni māfua’aga tau ia te ia ma lona aiga ua faaseetuāgalu ai ma le tofi ta’ita’ifono sa ia amata tauave i le tausaga e 2017, ae le oni mafuaaga tau upufai o malo.
Ua 73 tausaga o le soifua o lea tausala ma tina o le atunuu sa amata galue i le atina’e o tagata tafafao i le faato’ā 23 tausaga o lona soifua.
