O loo tau sa’ilia nei e leoleo se tinā e 79 tausaga le matua o Kalaiesitete.

Faamauina na amata sa’ili mai lea tinā talu mai le Aso Lulu.

I talaaga o lea matāupu, na mulimuli vaaia Elisabeth Nicholls o aga’i ese mai le fale e tausi ai tagata matutua poo le rest home i le Bartlett St, Riccarton i le itula e 6 i le afiafi. 

E oo mai lava i le taimi nei o loo tau sa’ilia pea Elizabeth, ma ua talosagaina ai foi e leoleo le mamalu lautele o le atunuu o loo alala ma papaaao i lea faaitu o Kalaiesitete mo se fesoasoani, ina ia siaki ane o latou tuāmaota ma laoa, ma vaavaai ane sia tinā. 

Ta’ua e le to’alua o Elizabeth, o loo aumau le tinā i le rest home ona o tulaga ua iai lona soifua mālōlōina, ua aafia i le dementia poo le tulaga ua galo le tele o mea faapea tagata.

O lana tatalo ina ia vave maua si ona to’alua. 

Ua faaalia foi popolega a leoleo i le tulaga ma’ale’ale o loo iai nei Elizabeth aemaise o le mata’utia ua iai nei le mālūlū i le aai o Kalaiesitete, e ono telē le aafiaga i lona soifua mālōlōina. 

O le taimi mulimuli na vaaia ai lea tinā o ia ofuina se ofuvae lanu moana, ma se ofu aluga lima uumi (blue pants, dark coloured long-sleeve top) ma seevae lanu uliuli. 

O loo faaauau pea sa’iliga, ma ua fautuaina le mamalu lautele ina ia vave faafesoota’i atu lo latou ofisa i le 111 pe afai o iai se tasi o loo silafia se faamatalaga poo iloa foi se itu o loo iai Elizabeth.

Puna o Faamatalaga: https://www.stuff.co.nz/nz-news/360714269/christchurch-woman-still-missing-city-endures-freezing-temperatures-overnight