Ua lapata’i mai leoleo, e le’i mae’a a latou su’esu’ega i le matāupu lea na tupu i le vaveao o le Aso Gafua o lenei vaiaso i Marokopa lea na tula’i ai se feteena’iga i le va o leoleo ma le alii o Tom Phillips se’ia oo ina fana ai e leoleo ma ua maliu ai o ia.
I se lipoti a le Radio New Zealand, o lea ua aga’i su’esu’ega a leoleo ina ia maua i latou na fesoasoani pe lagolago i le faalafiina o lenei tamā ma lana fanau; ae o se faamatalaga a se tasi o tagata mai lea vaipanoa na ia ta’ua ai, e laki pe a iai nisi e tula’i mai e faailoa o latou na faalafia Phillips ma lana fanau.
O le toe faamautinoaga lena mai le Komesina o leoleo, Richard Chambers e faapea, e le’i tapunia su’esu’ega a leoleo i le pe na faapefea ona lalafi lilo Tom Phillips ma lana fanau mo nei tausaga e tele, e toetoe fā tausaga.
O le taimi nei o lea ua tuuina atu tamaiti uma e to’atolu i lalo o le tausiga a le Oranga Tamariki, ma e pei ona maua atu i ulua’i lipoti o lenei faalavelave, sa iai faatasi e tasi o le fanau ma lo latou tamā i le taimi na faia ai feteena’iga ma leoleo, le teineitiiti o Jayda, ae o le itu e faafetaia ona e le’i lavea pe afaina ai lenei teineitiiti.
Ae o Jayda lea na fesoasoani e faasino i leoleo le nofoaga na maua iai isi ona tei sa latou sosola faatasi, i totonu o se vaomatua pe tusa ma le 2 kilomita le mamao ese mai le vaipanoa lea na fana ma maliu ai o latou tamā o Tom Phillips.
I se manatu o le Pulenuu o Waitomo, John Robertson, na ia ta’ua ai, ua tatau i soo se tasi o silafia ni faamatalaga o lenei matāupu, ona aga’i mai e faailoa i leoleo ma fesoasoani i soo se mea e latou te mafaia.
O se tasi o manatu ua lāgā mai lenei faalavelave, e pei ona saunoa le ta’ita’i o le asosi o leoleo, Chris Cahill, o manu’aga ogaoga o le malu o le malo lea na lavea mai ai a o aga’i atu e faafetaui Phillips, ua aga’i ai manatu e fesiligia le auala o loo faatino ai galuega a leoleo i nofoaga maotua nei.
Ta’ua e Cahill, ua laki sa latalata atu nisi leoleo (backup), ma vave ai ona maua se fesoasoani, auā e tele ina fealua’i to’atasi lava se leoleo e fai ana galuega i tua i nofoaga nei.
O se si’omaga e ono lamatia ai le saogalemu o leoleo a o galulue, ma o se itu ua tatau foi ona toe silasila iai le matāgaluega pe o saogalemu lava le galue ta’ito’atasi o se malu o le malo i tua i nei nofoaga maotua ma le vavae ese mai.
Puna o Faamatalaga: https://www.rnz.co.nz/news/national/572584/police-warn-investigation-into-marokopa-case-continues-with-search-for-accomplices
