Ua faailoa mai nei e le sui o le auaunaga e mata’itūina faamatalaga faalilolilo a le Atunuu poo le New Zealand’s Security Intelligence Service le moomia e tagata lautele ona fesoasoani atu ina ia mautinoa le malupuipuia lelei o faamaumauga ma faamatalaga tau ia Niu Sila ina ne’i oo ai le atunuu i tulaga ma’ale’ale, ma lepeti ai lona saogalemu.
Ua faamauina o loo maualalo le tulaga o le ono aafia o le atunuu i ni gaioiga faatupu faalavelave, ae e lē o alotamala ai le mata’ituina o faamatalaga ma faamaumauga e maua, ona i le latou iloa, e telē lava le avanoa e aafia ai Niu Sila i ni osofa’iga.
I se faatalatalanoaga a le sui o le ofisa faasalalau a le Newstalkzb ma le faatonu sili o le SIS Andrew Hampton na ta’ua ai e Hampton o loo iai popolega a le auaunaga i tupulaga talavou i le taimi nei talu ai le tele o a latou tusitusiga i luga o upega tafa’ilagi o tulaga o loo iai le tele o suiga i le malo ma le tamaoaiga ma le tuuina atu o faamaumauga faalilolilo i nisi ma le agaga e lepeti ai le saogalemu o le atunuu.
Na faaopoopo mai Hampton o le vaega ua lilifa iai a latou galuega ma a’oa’oga, o le faalaua’iteleina o le malamalamaga o le tagata i vaega e latou te iloa ai gaioiga a i latou i luga o upega tafa’ilagi ma lipotiina o ia gaioiga ma tusitusiga.
Na faailoa mai foi e le Faatonu Sili foliga vaaia o le tagata e ono masalomia o loo iai faanaunauga e fai ia gaioiga faasolitulafono, o se tagata e fesilisili ma fiafia e sa’ili’ili i matāupu tau faatupu faalavelave, ma o sē e maitauina lona lagolago i le tele o vevesi ma sauāga.
Puna o Faamatalaga: https://www.newstalkzb.co.nz/on-air/mike-hosking-breakfast/audio/andrew-hampton-sis-director-general-on-threats-to-new-zealand-the-publics-role-in-identifying/
