Ua faaauau ona taofia pea i le vaaiga a leoleo o le falepuipui i Tanumalala le alii Saina faipisinisi o Tao Liu poo Liu Tao e faatali ai le aso 25 o Aokuso e su’esu’e ai molimau a leoleo faasaga i ona moliaga o le taumafai e faaoo le oti i se alii leoleo o le malo.
Sa talosaga lea tagata faipisinisi e tatala i tua i ni aiaiga e faatalitali ai lona faamasinoga, peita’i ua teena e le faamasinoga ona e 3 matāupu o loo molia ai i le faamasinoga o matāupu faalotoifale o aiga e le’i tulai ai, e ese mai lea i moliaga ogaoga o loo tuua’ia ai i le Faamasinoga Maualuga e māfua i se matāupu i le va o ia ma lona to’alua, lea na aga’i iai leoleo mo le faia o se galuega ae umia ai e Tao Liu se laaumalosi o le ituaiga o le 22 semi automatic pistol na ia faapā ma lavea ai le ua o se alii leoleo.
O le matuiā lava o ia moliaga ma lona lē oo i le faamasinoga ua faavae ai le faai’uga e teena lana talosaga mo le tatala i tua i ni aiaiga.
E 8 moliaga i le Faamasinoga Maualuga ua ia ioeina ae 7 isi moliaga o loo tetee iai Liu Tao poo Tao Liu.
