Ua toe faaauau ona tapunia a’oga uma i Samoa ma ua tolu ai nei vaiaso o faatino lea tulaga ona o loo malosi le pepesi pea o le faama’i fiva o ponaivi le dengue fever.
O le faai’uga o le vaiaso na faailoa ai i lipoti le fano o le ola o se isi tamaitiiti ona o āuga o lea faama’i, ma ua to’aono ai tagata ua maliliu talu ona pesia le atunuu i le fiva o ponaivi.
O le po o le Aso Faraile na te’a nei na fano ai le ola o le tamaitiiti 7 tausaga le matua a o taofia i le potu mo gasegase tigāina.
O le tamaitiiti pito laitiiti e 2 tausaga le matua ua aofia i le ‘aumaliliu ona o āuga o le fiva o ponaivi talu mai le masina o Ianuari o le tausaga nei.
I le mālōlō ai pea o fanau mai le aga’i i falea’oga o loo faatino e le matāgaluega o a’oga ma aganuu fesoota’iga ma pule o a’oga uma a le malo ina ia mautinoa e tuuina atu pea matāupu mo fanau e galulue ai i o latou aiga.
O auala televavave foi o fesoota’iga faaonaponei ua faaaogā mo le faaauauina o a’oa’oga o matāupu eseese mo fanau a o nonofo ai i o latou aiga mo puipuiga o le faama’i fiva o ponaivi.
