Ua faaauau nei ona faamatuu atu vaegatupe o loo totoe o le miliona lona 3 mo nisi o itumalo faapalota faapea ma le tufatufaga o vaegātupe mo itumalo e le’i tauaaoina seleni o le tufatufaga o le miliona lona 3.
O le saunoaga faalaua’itele mai le Sui Palemia le afioga Tuala Tevaga Iosefo Ponifasio i le mae’a o le fono a le Kapeneta i le Aso Lua na faailoa ai le faai’uga e toe faamatuu vaegātupe sa taofia lē tumau.
Faaalia e le Sui Palemia o aiaiga ma tuutuuga o le faamatuuina atu o vaegātupe, o loo malu, ma e galulue faatasi ai le Matāgaluega o Tina ma Tamaitai, ma le Matāgaluega o Tupe, atoa ai ma le Pule ma le Su’etusi Sili.
Peita’i o le a faamuta le faamatuuina atu o vaegātupe o le miliona Tala lona tolu i le aso 30 Iuni 2025.
O lona uiga e pei ona saunoa Tuala e tāua tele mo Fono Faavae a Itumalo ona taunapa i le faamalieina o aiaiga ma tuutuuga, o le faamatuuina atu o nei vaegatupe e pei ona sau a’i i le miliona tālā muamua ma le lua.
O ia vaega e tatau ona faamalieina o le tuuina atu o lipoti o le su’eina o le faaaogāina o seleni ua mae’a faamatuu atu komiti a Fono Faavae.
