E lē tau faailo le molimauina pea e o tatou tagata Samoa o le faatupula’ia pea o le maua ai o le tele o fualaau faasāina ua ofi atu i totonu o le atunuu, ma ua gaosia foi e tagata i totonu o Samoa.
O se matāupu o loo laualuga pea, ma o loo maitauina le ave ai o le faamamafa i galuega faatino a le Matāgaluega o Leoleo, Falepuipui ma le Toefuata’iga, i le tele o osofa’iga o loo faatautaia.
O le po anapo na faamauina ai le faatautaia e le vaega o faasalalauga a le 1News o se sa’ili’iliga e uiga i le aga’i atu ai o fualaau faasāina i totonu o le atunuu, e pei ona molimauina ai le amata vaaia le faateteleina o lenei faafitauli i le Pasefika.
Photos: NZ Customs
Ua faamauina, o Samoa sa pei ua na o se nofoaga lea e mapu ai oloa faasāina nei, poo le vaega ua ta’ua o le transit point, ae o lea ua fetaia’i nei ma le faafitauli o le faatau ma le faaaogāina e nisi i totonu o laufanua, ma ua aafia ai le to’atele o tupulaga talavou.
O lea ua faaalia ai popolega o le tamaita’i Palemia o le malo tausi, Fiamē Naomi Mata’afa i le faatupula’ia o lenei matāupu.
I le au’ili’iliina o sa’ili’iliga i lipoti, o loo maitauina ai, o nisi o vaega o loo lipotia ai le faaaogāina o fanauiti – e faapea e faatau atu ina ia maua ai pauta faasāina o le meth poo le ‘aisa.
O se tulaga faamomoiloto, peitai o loo maitauina le alia’e ai o nei gaioiga faalēalofa.
E tusa ai ma faamatalaga i le oo atu ai o pauta faasāina ma nisi o meatōtino faasolitulafono, o loo maitauina ai o Amerika Samoa le tasi o atunuu o loo lipotia, o ui atu ai le tele o nei fualaau faasāina ma meatotino faasolitulafono.
E pei ona molimauina pea foi le tele o nisi o fualaau faasāina o loo taofia e le Matāgaluega o Leoleo ma le Ofisa o Tiute i le uafu faavaomalo, e pei ona iai foi le tasi o matāupu tele na maua i le amataga o le tausaga lenei i le masina o Ianuari, 2025 lea na maua ai le oo atu i le 10 kilokalama o pauta faasāina – pe tusa lea ma le 2.5 miliona tālā Niu Sila lona tau pe a faatau i le maketi.
I le alualu pea i luga o le numera o fualaau faasāina ua maua i le atunuu, o se faafitauli ua sasao faafaama’i, ua vaaia ai foi le moomia o le galulue faatasi o Matāgaluega eseese ma sui o nuu, aemaise o le tula’i mai o ta’ita’i e tineia le oo atu o fualaau faasāina i Samoa.
Ae a o tapisa ai le to’atele ma le oo mai ai o lipoti i nei matāupu i totonu o Samoa, o le mea mautinoa e lē fua tasi i se atunuu e tasi lenei faafitauli, inei i Niu Sila lava ia, o loo lipotia mai pea i lea vaiaso ma lea vaiaso matāupu, o le taofia ai e sui o le ofisa o tiute poo NZ Customs o ato ma faamomoli a tagata o ē o loo ulufale mai i le atunuu ma aumai faananā ai fualaau faasāina.
E pei ona lipotia mai i lena foi vaiaso, le taofia ma le molia ai o se tama’ita’i e 25 tausaga le matua, i lona aumai faananā ai o le pauta faasāina o le cocaine i totonu o lona atopa’u i le malaevaalele faavaomalo i Aukilani.
Ta’ua i lipoti mai le vaega o tiute, sa nanā mai e le tama’ita’i nei pauta i tua o vaega malō o le atopa’u poo le suitcase panelling.
Na taunuu mai o ia mai se faigāmalaga mai Santiago, Chile.
I faamaumauga e 4 kilokalama le mamafa o le pauta faasāina, pe tusa ma le $1.55 miliona lona tau aofai pe a faatau atu i le maketi.
Puna o Faamatalaga: https://www.1news.co.nz/2025/07/27/growing-issue-concerns-for-samoa-as-meth-spreads-across-pacific/
