E mafai ona lu’i i le Faamasinoga Maualuga a le atunuu le faai’uga a Falelatai e pei ona tapu ai vaega faaupufai ona afea le afio’aga i ni faalauiloa o faatosina o le palota poo le faatutū ai foi o ni laupapa e faalauiloa ai sui tauva.
O se faai’uga e lē o aafia ai le vaega faaupufai e puipuia aiā tatau a tagata lea o loo tauva ai le sui faaolioli o Falelatai sa tauaveina le nofoa o le itumalo palota o le itumalo faapalota o Falelatai ma Samatau i le paea’iga lona 17 a le Palemene.
O le feiloa’iga a le vasega o tusitala ma le Komesina o faigāpalota na fesiligia ai i sona finagalo e tusa ai i le tusi ua tuuina atu e le ta’ita’i o le vaega faaupufai o le Samoa ua Potopoto faatatau i le tapu a Falelatai ua aafia ai tapenaga a lea pati faaupufai o loo fia faia le latou faalauiloa i totonu o lea itumalo.
Le Komesina o faigāpalota, afioga Toleafoa Tuiafelolo Alexander John Stanley.
O le feiloa’iga a tusitala ma le ta’ita’i o le vaega faaupufai e puipuia aiā tatau a tagata na faailoa ai e le susuga Tuilaepa L Sailele Malielegaoi, o le faai’uga a Falelatai e leai se aafiaga o le latou patī faaupufai.
Peitai ua ia faailoa o faalauiloa faatosina ua afea ai nuu ma itumalo o se mea e fou, ma o se isi lea o tulaga o le a silasila iai lana vaega faaupufai pe a mae’a le faigāpalota ae toe pale i le pulega o le malo.
