Ua faamaonia mai le telē o se faaletonu o loo iai i se tasi o fuafuaga faataatia a le malo e tuuitiitia ai le numera o tagata e tagofia ma ulaina sikareti, ma le manulautī ia oo mai i le tausaga lenei 2025 ua maualuga se pasene e tuuitiitia ai le numera o tagata ulaula.
Peita’i ua lipotia mai e le leitio faavaomalo a Niu Sila i se faatalanoaga ma se tasi o foma’i, le alii polofesa ia Chris Bullen, o le National Institute for Health Innovation na ia faamanino ai, o le faafitauli tele lava o le toe apili ai e le malo o loo tula’ mai i le taimi nei o ni vaega tāua lava e 3 o le tulafono o le lē toe taumafa tapaa.
O le tasi o vaega na suia ma faatino e le malo i tausaga ua mavae i lenei tulafono, o le tapu lea ona toe faaopoopo atu le vailaau o le nicotine i tapaa, ma le isi o le tapu lea ona faatau atu ni tapaa poo sikareti ia i latou na fananau i tua atu o le aso 1 Ianuari 2009.
E manatu le alii foma’i, ua vavevave tele le malo i le faatino ai o lenei fuafuaga e aunoa ma le iloilo lelei o faiga faavae ma ta’iala e limata’ita’iina ai galuega faatino e ono gaua’i mai ai le loto o le tagata e tuu loa le ulaula tapaa.
E talitonu le alii foma’i, e mafai lava ona ausia fuafuaga i tulafono sa iai muamua, ae ua apili e le malo tulafono, ma o lea ua tauau ina lē ausia ai faamoemoega uma.
Mai faamauamauga, e 300,000 tagata Niu Sila e ulaula tapaa, ae o le naunauta’iga o loo iai, ia oo atu i le masina o Tesema o le tausaga nei 2025, ua 85,000 tagata ua lē toe taumafa tapaa; ia 5% o le a tuuitiitia ai.
Peitai e ui i se mana’o ma se naunauta’iga o le alii foma’i ma le to’atele o loo galulue e faataunuuina lenei faamoemoe, o loo iai lava popolega i le tele o tapaa o loo aumaia faasolitulafono i totonu o Niu Sila.
Ua faamauina e oo atu lava i le 25% o tapaa o loo faatauina faasolitulafono i le atunuu. Ma o le tele o nei tapaa o loo faatauina atu i le maketi ma tagata i se tau taugofie ma o loo faigofie ona maua e le to’atele.
O le isi faafitauli, o le vaaia lea o le faatupula’ia o fanau a’oga o loo taumafaina tapaa ua maua i lenei vaitau o le vape.
E pei ona vaaia le oo atu i le 44% o a’oga e tu lalata i se faleoloa e faatauina atu ai vape, ma e molimauina, ua oo lava i fanauiti e 10 tausaga le matutua ua tagofia vapes.
Puna o Faamatalaga: https://www.rnz.co.nz/news/thedetail/560760/smokefree-2025-goal-all-but-up-in-smoke
