E tatau ona silafia e tagata uma e uia le auala laupapa tele i Aukilani le Harbour Bridge, e ono iai se poloka tele i le auala lea i le taeao o le Aso Toonai, o a taeao lea, ona o se solo tele o loo fuafua mo le lagolagoina o Palesitina.
E latalata i le afe tagata ua uma ona saini i luga o le facebook mo lo latou auai atu i le solo tetee lea o le “March for Humanity” o le a amata mai Stafford Park i Northcote i le ‘afa o le 9 a taeao.
O le a savalia e lenei solo le auala laupapa i Aukilani ma faasolo atu ai i le Victoria Park i le ogatotonu o Aukilani.
Saunoa se ta’ita’i leoleo mai le faaitu i Waitemata, Commander Stefan Sagar, o loo tapenapena lava leoleo i le latou tali atu i nei solo tetee.
O le tiute lava ia a leoleo i taimi faapea o solo tetee, ia faamautinoa o loo faia i se tulaga filemu ma ia ogatusa ma le tulafono le faatinoga o nei solo.
O le latou faamuamua ia saogalemu tagata uma o loo faaaogāina le auala, o tagata lautele, o leoleo, faapena foi ma i latou o loo savavali tetee.
O loo aumai ai se lapata’iga mot agata uma o Aukilani, ina ia faatalitalia e ono iai ni vaega o le a faalavelavea ai feoa’iga masani i luga o lea faaitu auala, aemaise lava i le auala laupapa i Aukilani, ma ia nofo sauni iai pe mafai ona faaaogā isi auala ‘alo i lea taimi.
O loo uuna’ia tagata faimalaga uma e fai ma siaki i itulau i luga o le social media a le NZTA a Aukilani, i le taeaopo o le Aso Toonai ma isi lava vaega o le aso e iloa ai vaega o le auala o loo saogalemu ma avanoa mo feoa’iga, a o lei aga’i atu se faigamalaga.
O le a faaaogā foi le AT Mobile app ma le latou upega tafa’ilagi e faailoa mai ai nisi vaega o le a faalavelavea ai feoa’iga a le mamalu o le atunuu.
Na faaalia e leoleo, o lea foi ua mae’a ona faia a latou soalaupulega ma i latou o loo faamaopoopoina nei solo tetee.
Puna o Faamatalaga: https://www.rnz.co.nz/news/national/572824/significant-disruption-expected-on-harbour-bridge-amid-protest
