Ua faamaonia mai le oo atu i le 20 fautuaga ma lapata’iga a le Ofisa o le Vaaitau mo le atunuu atoa mo le isi 36 itula.

Ma le tele o galuega mata’itū a o vaaia ai le malosi o timuga o le a aafia ai faaitu o North Island ma le South Island.

Ma ona o ia tulaga, o loo faamauina ai le ono aafia o le atunuu i lōlōga tetele, ma ua maitauina ai le galulue o auaunga o faalavelave faafuase’i ma fesoasoani muamua e mata’itūina lelei tulaga o le saogalemu ma le puipuiga mai ni faalavelave e ono tula’i mai. 

Ua faamauina i lipoti a le New Zealand Herald e tusa ai o se faamatalaga mai le vaaitau, e fai lava sina malosi o timuga mamafa ma vaaia le loulouā tele o le tau i Aukilani, i le aoauli nei.

Ma o loo vavalo le matua’i aafia ai i lōlōga ma vaaia  le emo malosi o uila ma faalogoina le pā pā o faititili i lenei aso. 

Ua māua foi le oo atu i le 100 kilomita i le itula le malosi o savili ma matagi o le a aafia ai le atunuu.

Ua fautuaina vaega o Bay of Plenty i timuga mamafa e faasolo atu i le vaeluaga o po ma ao i le afiafi a nanei. 

Lapata’ia foi tagata failafumanu o loo iai iai i nofoaga maualalao e lata ane i le vaitafe o Rangitāiki ina ia aga’i i nofoaga maualuluga, ia faamuamua pea le saogalemu o lafumanu ma i latou uma o loo aumau i nei faaitu, ina ia faasaoina i latou uma mai lōlōga.

Ua lipotia foi le tuuina atu o fautuaga ma lapata’iga o timuga mamafa i Nelson, e faamauina le oo atu lava i le 150 mm le tele o suātimu o loo vavalo e pa’ū mai mo ia faaitu o le atunuu. 

Ua ta’ua e se tasi o sui o le Earth Sciences New Zealand o le a vaaia e Nelson ma Blenheim le pa’ū ai o timuga e faatusa poo le masina atoa le tetele o timuga o le a o latou vaaia i totonu o le 48 itula.

Ua fautuaina malosi ai tagata o loo aumau i nei faaitu ina ia tapena lelei ma aga’i i ni nofoaga saogalemu pe a oo i oooga o le loulouā o le tau.

I Motueka ua vaaia le amata tapenapena o vaega e fesoasoani e tali atu i lōlōga, e pei ona amata faatumu ai taga oneone e fatu fatu i itu e mautinoa e aafia i lōlōga.

Puna o Faamatalaga: https://www.nzherald.co.nz/nz/live-updates-flood-threat-as-tropical-deluge-brings-downpours-gales-thunderstorms-to-nz/