A o iai i le vaiaso nei le Sui Palemia o le malo o Samoa ma lana usugāfono i le tauaofiaga lona 80 o le fono faaletausaga a Malo Aufaatasi o loo usuia i le nofoaga tutotonu o lea faalapotopotoga tele o malo o le lalolagi o loo i le aai o Niu Ioka i Amerika; ua faailoa mai i lipoti o lea fonotaga e 142 atunuu na palota e lagolago le i’ugafono poo se resolution a Malo Aufaatasi e autū i le taofia loa o le taua a Isaraelu faasaga i le vaega faatupu faalavelave o le Hammas ma faavaeina ai loa ma se malo o tagata Palesitina.
O Samoa ma Fiti atunuu o le Pasefika o loo aofia i atunuu e 12 e le’i palota, ae sefulu atunuu e aofia ai Amerika ma Isaraelu sa palota e teena lea i’ugafono a Malo Aufaatasi.
O Fiti o le vaiaso na te’a nei na feiloa’i ai le Palemia o lea malo ma le Palemia o Isaraelu i le tatalaina o le ofisa o le malo o Fiti i le aai o Ierusalema, ae o Samoa ma le tula’i mai o le faigāmalo fou a le Faatuatua i le Atua Samoa ua Tasi, ua faailoa e le afioga i le Palemia le susuga Laaulialemalietoa Leuatea Polataivao Fosi Schmidt e tutū faatasi ma Isaraelu o le nuu o le Atua.
E lima atunuu o le Pasefika o loo teena le i’ugafono ae lagolago i le malo o Isaraelu; o Tonga, Papua Niu Kini, Nauru, Palau ma Maikoronisia.
