Ina ua lalata i le taimi e faatino ai le faanofotupu o le Palemia o Niu Sila i le taeao o le Aso Gafua o lenei vaiaso, ae taunuu le pepa o faamatalaga mai le ofisa sooupu o le tatou malo ua faamanino ai le tulaga na saunoa iai le Palemia o Samoa i le māfua’aga o le faaaloalo i le faafotu tupu o le Palemia o Niu Sila.

Ua faailoa ai e leai se sui o lea malo poo le Palemia na molimana’o e faatino lea faaaloalo maualuga.

O le faamoemoe na a’e i se finagalo o le malo o Samoa e avea o se faaaloalo mo le alii Palemia o Christopher Luxon.

Faaalia foi i le pepa o faamatalaga se finagalo o le Palemia susuga Laaulialemalietoa Leuatea Polataivao Fosi e faapea e le’i iai se faamoemoe e faatino le faafotutupu e faatilotilo ai i se faamanuiaga mai le Palemia poo totonu o le li’o o upufai o lea malo e faasino i faiga faavae tau femalagaa’iga.

I le saunoaga a le Palemia i le tali faaaloalo e ala i le taumafataga i le faletalimalo o le Taumeasina Island Resort i le po anapo, na ia tuualalo ai i le Palemia o Niu Sila e aua le amana’ia le pola e motu i tua e ala i tala i luga o upega tafa’ilagi le social media.

O le Aso Lua e mae’a ai polokalame o le malaga taualoa a le Palemia o Niu Sila i Samoa lea o le a taualuga i le maimoaina o se taaloga lakapi liki i le va o se ‘au mai Niu Sila ma se ‘au i Samoa.

A mae’a lea taaloga o le a faailoa ai ma le Ipu a le Palemia o Niu Sila e tauva iai aulakapi liki a Samoa, ona aga’i lea i le malae vaalele i Faleolo ma tuua lo tatpu atunuu mo le afea o le malo o Tonga.