Ua faamaonia mai e leoleo le lē mafai ai ona maua tonu le mafua’aga o le maliu o se alii na maua lona tino i le malae poo le paka i Aukilani, a o iai sa’ili’iliga i se tasi o matāupu o le talepe fale na aafia ai se faleoloa. 

Ua faamauina i lipoti, na ta’ua ai e le Satini Sinia, Detective Senior Sergeant Anthony Darvill, na valaau ane lo latou ofisa mo se fesoasoani i le faleoloa poo le hardware retail store i Ellerslie-Panmure Highway ina ua fiki le faailoilo o le faleoloa poo le alarm i le ‘afa tonu o le itula e 1 i le vaveao.

Na aga’i iai leoleo i le faleoloa ma amata su’esu’ega, na faapena foi ona faaaogā le vaalele a leoleo le Eagle e fesoasoani i le sa’iliga. 

O le aga’i atu o le vaalele i le faaitu o loo iai le paka, na iloa atu ai le tino o le tagata o loo taatia i le malae.

Ta’ua e le’i faapea ona te’i mai i luga lea tagata pe mānava foi, ma o lea na tali atu iai le fesoasoani muamua. 

Na faamanino e le alii satini sinia ia Darvill, o loo galulue nei lo latou ofisa e su’esu’e pe iai ni sootaga o lea tagata i le matāupu na tula’i mai i le faleoloa ae mulimuli ane ai maua lona tino i le paka.

Ma ua faamaonia mai ai foi e leoleo e lē o mailoa tonu le mafua’aga o le maliu o le alii, se’i vaganā le maua mai o taunuuga o le taotoga faapitoa mo maliu lilo.

Faamauina o iina faato’ā maua ai le atoaga ma itu e aga’i iai sa’ili’iliga ma su’esu’ega a leoleo.

Puna o Faamatalaga:  https://www.nzherald.co.nz/nz/police-investigating-unexplained-death-in-mt-wellington-auckland-park/MDBKGGPHMFD5LC7T3ZMEX36LPQ/