Ua faamaonia mai e le Auaunaga o le Soifua Mālōlōina le Health NZ, lo latou lē gafatia ai ona faafaigaluegaina poo le toe faaopoopo atu ai o le numera o tausi soifua faamauina; e ui o loo maitauina le moomia o le numera e faatautaia galuega.
I faamaumauga, e na o le 45% o tausi soifua ua faauuina ua mafai ona maua galuega.
O se faaaliga ua faate’ia ai le to’atele, ae ua fetaui tonu lelei le oo mai o nei faamatalaga ma le faatino ai o solotetee a tausi soifua, o faatōsaga, ma le to’atele o tagata faigaluega a le soifua mālōlōina e silia ma le 36,000 i latou ua amata nei solotetee i le atunuu atoa mo le 24 itula.
Ma i lenei solotetee tele o loo faamanino ai e ia tagata faigaluega, e lē na o tupe ma totogi le mafua’aga o le tetee, ae o le latou finau ia ave foi le faamuamua a le auaunaga ma le malo i le moomia ai o le faaopoopo atu o tagata faigaluega e tausoa le galuega.
Na faamatala e nisi o tausi soifua, le lē saogalemu o tulaga o loo faigaluega ai le to’atele ona o le lē lava o tagata faigaluega e faasoa iai tiute o lea aso ma lea aso; aemaise le leai o nisi e tali atu i nai tagata o loo aotovaa atu i maota gasegase mo se fesoasoani.
Ma ona o nei faafitauli, o loo finau pea le Iuni o loo nafa ma le finauina o le itu a tausi soifua ma le to’atele o tagata faigaluega o le soifua mālōlōina o Aotearoa ina ia maua se tali, a o se soalaupega ma le malo ma le auaunaga ina ia maua se tasi i totogi talafeagai mo ia tagata faigaluega ae o le maua o se tali i le tulaga o le moomia ai o le faaopoopo ai o tausi soifua e faatinoina tiute ma faiva.
Puna o Faamatalaga: https://www.rnz.co.nz/news/national/568412/health-nz-admits-it-can-t-afford-to-employ-all-nurses-wanteeeebing-work
