Ua faamautū mai e le tamaitai loia le afioga Mauga Precious Chang lona tauaaoina o se tusi mai le Matāgaluega o leoleo ua logo atu ai, ua le faaauauina le tagi na faaulu atu faasaga i le susuga Tuilaepa L Sailele Malielegaoi, e pei ona mafua ai ona faaulu le tagi a le ta’ita’i o le Faatuatua i le Atua Samoa ua Tasi le susuga Laauli Leuatea Polataivao Fosi Schmidt.
O Mauga Precious Chang o le loia a le susuga Laauli ma o lana tagi sa tuua’ia ai le ta’ita’i o le Itu Agai i ni tala sa ia saunoa ai i luga o auala o fesoota’iga faaonapo nei le api o foliga, sa ia tuua’ia ai Laauli i le faalavelave tau taavale na maliu ai Tuuau Maletino Faasavalu.
O le tuua’iga foi a Tuilaepa sa faatūtū i se tamalii sa avea ma Faipule ua tuumalo le afioga Vaele Iona.
Ua lē mafai e leoleo ona faaauau le tagi faasaga i le ta’ita’i o le Itu Agai ona ua lē lava mau e lagolago ai le faia o ni moliaga faasolitulafono.
O le tagi sa autū i le faaleagaina o Laauli ma le faletua o Vaele ona o tuua’iga a Tuilaepa.
O le taunuuga o su’esu’ega a leoleo ua lagolagoina e le Loia Sili lea sa ave iai le faila o su’esu’ega mo sana fautuaga.
Faaalia e le tamaitai loia o Mauga Precious Chang e leai se tusi na tuuina atu e le Loia Sili, ae ua na o le tusi a leoleo ua faailoa atu ai le taunuuga o a latou su’esu’ega.
