Ua folasia mai nei se i’uga o le iloiloga a le Faamasinoga Faavaomalo, le International High Court of Justice e tusa ai ma le finau e pei ona laualuga pea i le lalolagi i suiga ogaoga o le tau – le Climate Change.
O le latou tali i finauga ma folasaga na faatino talu mai le tausaga 2023.
E pei ona avea ma talafaasolopito le auai ai o Samoa mo le ulua’i taimi i le Faamasinoga Faavaomalo, le International High Court of Justice i le tausaga na te’a nei 2024 e faaopoopo atu i lea finauga.
Ma o le asō na tuu mai ai iloiloga a le ICJ, ma o le latou manatu, e iai le matāfaioi faaletulafono a setete ma atunuu mo le faatinoina o galuega e tuuitiitia ai kasa oona ma o loo aafia ai le si’osi’omaga (greenhouse gas emissions), faapea taumafaiga e tali atu ai i suiga ogaoga o le tau.
Faaalia e sui o lea vaega tāua o Malo Aufaatasi, o suiga ogaoga o loo aafia ai le tele o atumotu (climate change) ua ia faaupu o se vaega e solia ai aiā tatau a tagata soifua mai le ola sa’oloto i se si’osi’omaga mamā ma saogalemū.
Ta’ua foi, afai ae lē o mulimulita’ia pe o ausia e atunuu tulaga ua faataoto mai i le puipuia o le si’osi’omaga, o loo faamauina le moomia ona faia iai o se galuega ae ia vave.
Ua faamanino mai, e lē o folasaga e noatia ai atunuu, peita’i o le latou tilotilo o le a fai lea vaega ina ia saga faamalosia ai atunuu ma setete e latou te mulimulita’ia aiaiga ua o latou sainia i lalo o le Maliega o le Paris Agreement.
O se tala faasolopito foi o lea faamoemoe tele, ona sa amata mai lenei finauga ina ua omai faatasi malo o le atu pasefika ta’ita’ia e Vanuatu, O se finauga na mapuna mai i galuega fita a tupulaga talavou, o fanau aoga na tutulai e tete’e atu i suiga o le tau – Climate Change Fight.
Puna o Faamatalaga: https://news.un.org/en/story/2025/07/1165475
