Ua faailoa se finagalo o le Palemia o le malo tausi ina ua fesiligia e tusa o le aumai o le faamanatu a le Komesina o faigāpalota i patī faaupufai ma sui tauva faaolioli, ua logoina ai o le aso 14 o le masina lenei o Iulai e faato’ā amata ai le piliota o faalauiloa faatosina.

O se faasilasilaga faalaua’itele ua fesiligia e nisi le taimi ua aumai ai ae ua 3 i le 4 vaiaso talu ona molimauina faalauiloa o sui tauva faaolioli ma faalauiloa o ta’iala o anavatau a nisi o patī faaupufai.

Faaalia e le Palemia le afioga Fiame Naomi Mataafa e ui o se faigāpalota lautele ua faafuase’i, ae o aiaiga o le tulafono e tapena ai se palota aoao e lē o suia, o loo tumau lava i le 3 masina. 

Le Palemia o le malo tausi ma le ta’ita’i o le vaega faaupufai o le Samoa Uniting poo le Samoa Ua Potopoto, afioga Fiame Naomi Mataafa.

Ae i le matāupu lava i le piliota o faalauiloa faatosina lea ua faatulaga mo le ono vaiaso e amata i le aso 14 o Iulai ae mae’a i le aso 24 o Aokuso, o le Aso Lua o le vaiaso nei na tuuina atu ai e le Komesina o faigāpalota sana tusi e tali atu ai i se faatalauula a le ta’ita’i o le vaega faaupufai e puipuia aiā tatau a tagata, lea sa fesiligia ai e le susuga Tuilaepa L Sailele Malielegaoi se faamaninoga o le faasalalauga e faasino i le piliota o faatosina ma le tapu o ia faalauiloa i le taimi nei.

Ua faailoa atu e le Komesina le afioga Toleafoa Tuiafelolo Alexander John Stanley i le susuga Tuilaepa, o loo manino e patino le faasalalauga i sui tauva ua talia aloa’ia le lesitala i le ofisa o faigāpalota.

E lē o aofia ai le faalauiloaina o anavatau ma le faailoa o sui faatutū o loo faaolioli mo tofi o le Palemene.

O le taimi nei e le’i tatalaina le piliota e faaulu atu ai sui tauva e pei ona faatulaga mai e le Komesina o faigāpalota o le Aso Gafua o le vaiaso asau aso 7 o Iulai e amata ai, ae tapunia i le Aso Toonai 12 o Iulai.