E le o lagolagoina e nisi sa avea muamua o taitai o atunuu Pasefika le feagaiga ua ta’ua o le AUKUS, poo le maliega a Ausetalia, Peretania ma Amerika.
O se maliega e ui o loo faapea e puipuia ai atunuu nei e tolu ma e telē le avanoa mo le Pasefika, peitai fai mai le Pacific Elders’ Voice lea o loo iai i latou sa taitaia Kiripati, Marshall Islands, Tuvalu ma Palau, ua o se faiga o le a faalatalata mai ai taua i le Pasefika.
O le faia ai foi o vaa moulu faaniukilia lea o loo sau i lea feagaiga o le a faaleaoga ai taumafaiga o loo agai iai le Pasefika e lagolago puipuiga mai suiga o le tau.
Ua toe talosaga ai taitai nei i le malo o Ausetalia e toe tagai ane i le Pasefika ma lona saogalemu.
O loo iai foi le popolega o i latou nei i le faalogologo mai o lea e foliga mai o le a agai Niu Sila i totonu o le li’o lenei a le AUKUS ma ua toe augani mai ai e aua.
