O le vaiaso nei ua fe’au ane ai e le Matāgaluega o le Va i Fafo a Denmark le sui o Amerika i lona atunuu ina ua agiga ni faasalalauga e faatatau i nisi alii Amerika ua faia ni a latou taumafaiga i totonu o Greenland.
Fai mai le CNN o faamatalaga o se su’esu’ega na faia e le ofisa faasalalau lea a Denmark ua iloa a itiiti mai pe to’atolu ni alii Amerika e iai sootaga i le Peresetene o Trump, ua faia ni a latou operation i Greenland ma ua afua ai ma ni popolega e ono foliga o loo galulue e una’i finagalo o tagata lautele aga’i i le faanaunauta’iga o Trump e avea Greenland o se vaega o Amerika.
O Greenland o se motu e tele ona ala’oa i le vasa Atalani ma o se teritori o Denmark.
Ua fai soo pea iai faamatalaga a Trump e manao e faoa lea motu ma ia taua e manaomia mo ni mafua’aga tau le puipuiga peita’i o loo matua’i tetee iai Greenland faapea foi ma Denmark.
Ua faamaonia mai la i lipoti a le ofisa o le malo o Amerika e moni o loo faagasolo le fonotaga a le sui lea o le malo Mark Stroh ma le matāgaluega o le va i fafo a Denmark i le aso ma ua faailoa e le sooupu a Amerika e leai se tulaga e mafai ona faatonutonu ai e le faigāmalo a Amerika gaioiga a nisi o sitiseni o le atunuu ma e faaaloalogia foi e Amerika aiātatau a tagata o Greenland e faamautū ai lona lumana’i.
Puna o Faamatalaga: https://edition.cnn.com/2025/08/27/europe/denmark-summons-us-envoy-greenland-intl
