Ua faailoa e le Peresetene o Brazil o Luiz Inácio Lula da Silva i le BBC, e matua’i leai lava ma se la sootaga ma le Peresetene o Amerika o Donald Trump.
Ta’ua i le lipoti e masani ona faitio Lula ia Trump ae o se faamaoniga mautū la lea e atagia ai ua matuā malepe fesoota’iga i le va o ia ta’ita’i e to’alua.
Ua faailoa e ui o loo iai i se tulaga lelei fefaataua’iga i le va o Amerika ma Brazil peita’i ua tuuina foi e Trump le 50 pasene o tariffs faaopoopo i oloa mai Brazil i Amerika i le masina o Iulai ma sa le’i fiafia iai le Peresetene o Brazil.
E le’i talanoa faafesaga’i lava i la’ua ia ma ina ua fesiligia Lula pe aisea e lē talanoa ai ia Trump i le telefoni, na ia ta’ua ai e māfua ona e na te le’i viliina lava se telefoni ia Trump ona e lē fia talanoa ane ia te ia.
Ina ua toe fesiligia la e le BBC e faamatala ane le la sootaga poo le mafutaga foi ma Trump, na tali Lula, e leai se mafutaga, ma le isi itu o Trump o le Peresetene o Amerika ae lē o se Emeperoa o le lalolagi.
Puna o Faamatalaga: https://www.bbc.com/news/articles/c3rv981qv4go
