E foliga mai e toe faatumauina lava le tofiga o le Peresetene o Bougainville i le alii o Ishmael Toroama ina ua maua faamatalaga o loo sili ana palota i le faigā filifiliga a le atunuu na se’i mavae atu.
Fai mai o le mae’a o le faitauga muamua ua iloa ai e toeitiiti 90 afe palota a Toroama ma ua faamaonia lea e le ofisa o faigāpalota a lea atunuu.
O loo sosoo ai ma le isi faipule ua leva foi i le Palemene o Papua Niu Kini, o Joe Lera.
E ui i lea fai mai lipoti a le RNZ o loo faatalia pea i’uga aloa’ia pe a mae’a le galuega a le ofisa o faigāpalota.
E silia ma le 239 afe tagata na lesitala e palota i Bougainville ma o le matāupu laualuga lava i finagalo o le to’atele o lona tuto’atasi.
E lē o toe mamao faamautū mai le faai’uga aloa’ia o lea faigā filifiliga.
Puna o Faamatalaga: https://www.rnz.co.nz/international/pacific-news/574095/incumbent-toroama-leads-bougainville-presidential-seat-in-initial-results
