Ua lipotia mai nei le amata aveese mai ai o sui o le au kirikiti a Niu Sila mai Initia ma Pakistan, talu ai le faatupula’ia pea o feeseesea’iga ma vevesi a autau poo militeri a atunuu nei e lua.
O le tilotilo i le saogalemu o autaaalo a Niu Sila na ala ai ona faia se faai’uga i le lē auai ai o Niu Sila ma o latou tagata taaalo i taamilosaga e pei ona masani ona faatino i lea itu o le laloagi, o taaloga ua faaigoaina o le Indian Premier League (IPL) ma le Pakistan Super League (PSL).
Ua ta’ua i lipoti mai le leitio faavaomalo a Niu Sila, o sui o le autaaalo a le atunuu na fuafua e auai i le taamilosaga o le Pakistan Super League (PSL) ua aga’i i Dubai, ma sui na auai i le taamilosaga o le Indian Premier League (IPL) na mafai ona aga’i ese i le maua a’e ai o faamatalaga i le mafai ona feoa’i vaalele.
Ua faamauina e taofia le taamilosaga o le (IPL) ua toe 12 autaaalo o totoe, ae mo le le taamilosaga o le (PSL) ua lipotia mai le taofia ma ua tolopo mo se isi taimi.
Mo le silafia na tula’i mai lenei vevesi, ina ua maliliu ni turisi, ina ua tafana i totonu o le nofoaga o loo puipuia i vaega faamiliteri i Kashmir.
E to’a 26 turisi na maliliu i lenei faalavelave.
Puna o Faamatalaga: https://www.1news.co.nz/2025/05/10/nz-cricketers-playing-in-india-and-pakistan-flee-amid-military-tensions/
