I le masina o Ianuari o le tausaga nei na talia ai e le Faamasinoga Faaitumalo le talosaga a leoleo i aiaiga e tatala ai i tua le sui Faipule o Gagaifomauga 3 le susuga Laauli Leuatea Polataivao Fosi Schmidt, o lea ua mātalatala nisi o aiaiga ina ua talia e le Faamasinoga Maualuga le talosaga a Laauli ma lana loia sa lu’i ai ia aiaiga poo le bail conditions.
O le taofia o le malaga ese ma le atunuu o lea sui Faipule o le ta’ita’i o le vaega faaupufai o le Faatuatua i le Atua Samoa ua Tasi, ua aveesea.
Ua faapena foi ona aveesea le aiaiga o le saini i le ofisa o leoleo i vaiaso uma.
Le susuga Laauli Leuatea Polataivao Fosi Schmidt.
O le amataga o lenei vaiaso e amata ai taualumaga a le Faamasinoga Faaitumalo i nisi o moliaga o loo tuua’ia ai e leoleo Laauli, faapea isi tagata e to’alima e aofia ai le tasi o sui Faipule o le Palemene, afioga Fepuleai Faimata Su’a, o le susuga Li’o Faataumalama Auava, o Lise Marie Schmidt, ma le ulugalii o Samuelu ma Sivai Fauena.
O loo faatulaga o le vaiaso atoa lenei e su’esu’eina ai molimau a leoleo, ma molimau a i latou o loo molia.
