I le savalia ai nei o le sefulu tausaga o tauave e le afioga Tauiliili Taua’aletoa Sekuini Solomona Auelua le tofiga faamasino o le Faamasinoga o Fanua ma Suafa a le atunuu, o lea ua siitia nei lona tulaga i le avea ma se tasi o Pelesetene Lagolago o lea faamasinoga.
O le Aso Faraile ua mavae i le maota faamasino i Mulinuu sa faia ai le sauniga na faatauto ai i luma o le Pelesetene, le Sui Pelesetene ma le paia maualuga o lea faamasinoga aemaise aiga ma uo, le afioga Tauiliili.
Sa ia momoli ai le faafetai i le Pelesetene ma le Komisi o galuega a le faamasinoga i le faatuatuaga ma le talitonuina o lona tagata e na te tauave tiute o le pelesetene lagolago.
O le afioga Tauiliili Taua’aletoa Sekuini Solomona Auelua na ulua’i avea ma faamasino o le Faamasinoga o fanua ma suafa i le masina o Tesema o le tausaga e 2013.
Sa filifilia ai faatasi ma isi tamalii e to’atolu e aofia ai se tama’ita’i e avea ma faamasino o lea faamasinoga.
