E lē toe tau faailo le mata’ina o taumafaiga a le ‘au o le Moana Pasifika i le taamilosaga o le Super Rugby Pacific i lenei tausaga.
Ua faamausalīina foi lea tulaga i le maua ai o se pepa o faamatalaga mai le ‘aulakapi le maua ai e le alii kapeteni o le ‘au ia Ardie Savea le faailoga o le Tama Taalo o le Tausaga 2025 o lea lava taamilosaga.
Na maua faamatalaga o lea faaeaea mo le alii taalo Samoa ina ua o latou faato’ilaloina le ‘au a le Blues i le latou taaloga i le malae o le North Harbour Stadium i le afiafi o le Aso Toona’i na te’a nei.
Faaalia e le alii 31 tausaga lona “agaga faafetai”, i le faaeaea ua tuuina atu, o se faamanuiaga lona maua ai o lea faailoga taualoa i le taaloga.
Ta’ua e Ardie Savea, ‘e le’i mafai ona ia maua lea faaeaea pe ana lē seanoa le lagolago a lona aiga aemaise lana ‘au o le Moana Pasifika.’
I le taaloga ma le ‘au a le Blues, na maua ai e Savea le 6 o palota, ae 42 palota na ia ausia talu ona amata le taamilosaga i lenei tausaga, ua maualuga ai ia Tom Hooper e 31 ana palota ma le alii o Damian McKenzie e 28 palota.
Ua faamauina, talu ona ofi mai le alii o Ardie Savea i le Moana Pasifika, ma amata taalo mo le ‘au i le taamilosaga o le Super Rugby i lenei tausaga, ua 5 ana sikoa mo le ‘au, 330 mita ua mafai ona ia tauaveina ai le polo lakapi i taimi o taaloga, 115 pu’e ma ia manumaloina le 13 o le faoina o le polo mai le isi ‘au poo turnovers i taaloga uma ua ia taalo ai.
O le alii o Ardie Savea, o loo maualuga ai foi ona ‘ai i faatulagaga o ‘ai o tama taaalo o le foueti poo le loose forwards i le taamilosaga ma o se tama taalo aupito i maualuga taimi e filifili ai mo se taaloga.
Na faailoa e le Faia’oga Ulu o le ‘au ia Faalogo Tana Umaga le telē o le sao o Savea i le ‘au a le Moana Pasifika, ma ua ta’ua ai foi lona mitamitaga i vaega ua mafai ona ‘ausia e lea atalii o le atunuu i le taaloga lakapi.
Ta’ua i pepa o faamatalaga, o le a tuuina aloa’ia atu i le alii o Ardie Savea lana faailoga, poo lana pine o le Tama Talo o le Tausaga 2025 pe a mae’a le taaloga a le ‘au a le Moana Pasifika ma le ‘au a le Hurricanes i le aso 31 o Me.
Puna o Faamatalaga: Moana Pasifika – Press Release
